MMIX·VI·III : DIE·MERCVRII : A·D·III·NON·IVN

ACTA DIVRNA

Transcriptus:

Aliam decurionem discessisse, gubernamentum Britannicum collapsurum

Postremam superstitem Titanicae obiisse

&

Aeronauticam novum spatiplanum deducturam

ScorpioMartianus: Acta Diurna Radiophonica diei Mercurii 3 Junii 2009 L. Amadeus Ranierius nuntians Kintnersvillae in Pennsylvania salutem dicit.

Hazel Blears munus suum in gubernamento Uniti Regni deposuisse, nuntiat TimesOnline.

Domina Blears quarta est inter alios ministros qui resignaverunt hac septimana, postquam populus certior factus esset de suspicionibus hujus gubernamenti corruptionis. De resignatione, dixit Toriorum dux David Cameron hoc esse 'provocationem directam auctoritati' Primi Minstri a Domina Blears.

Hazel Blears.

Navis Titanica.

Millvina Dean.

Navis Titanica, cujus naufragium infamosissimum etiam in cinematographeo celebratum est, imaginationem multorum capit. De ejus ultima viatrice narrat Johannes Alatius, correspondens noster Europaeus in Suetia:

[Johannes Alatius:] Postremam superstitem Titanicae diem supremum obiisse nuntiat BBC.

Die 10 Aprilis anno 1912 in Anglia fere 2,000 hominum in illam notissimam et maximam suae aetatis navim, nomine "Titanic", conscenderunt, omnino nescii eam quinque diebus post sub undis Atlantici submersam fore. Quorum minima natu fuit Millvina Dean, quae cum fratre parentibusque in Americam migrabat.

Quamquam ipsa nullam stragis memoriam habebat, quippe quae trajectu duos tantummodo menses nata fuerit, Titanica vitam ejus funditus movit: "Ni mersa esset navis," ajebat, "Americana essem." Nam patre naufragio amisso familia rursus in Angliam reversa est, ubi Millvina majorem suae vitae partem degit.

Postquam reliquiae navis anno 1985 repertae sunt, studia plurium hominum allexerunt, et Millvina desiderari coepit in conventiculis, et in Europa et in America, ubi Titanicae cupientibus historiam suam libenter narrabat.

Sed displicuit ei, quod urinatores fractam navim explorabant, neque pelliculam umquam vidit, timens ne animum ejus admodum graviter perstringeret.

Die Solis 31 Maji Millvina, postrema superstes Titanicae, e vita discessit, 97 annos adepta.

Johannes Alatius, Upsaliae, Suetia.

[L. Amadeus Ranierius:] Aeronauticam Americanam novum spatiplanum in orbitam projecturam esse, nuntiat Space.com.

X-37B OTV-1 (Orbitale Temptativum Vehiculum 1), quod sine humano gubernatore navigatur, Januario 2010 in spatium deducetur ut technologiae variae probentur, quae itinera spatialia vilioris pretii facient.

X-37B OTV-1 -- NASA.

Ita fine nuntiorum facto bene valere dicit L. Amadeus Ranierius pro ScopioneMartiano.